15-apreldan 16-aprelga o‘tar kechasi Yaponiya janubi-g‘arbidagi Kyusyu orolini larzaga keltirgan 7,3 magnitudali zilzila Futagava yorig‘i hududida tog‘ jinslari deyarli ikki metrga siljishi oqibatida sodir bo‘lgan. Bunday xulosaga yaponiyalik seysmolog olimlar keldi, deb yozadi “TASS”.
Ularning fikricha, Futagava yorig‘ining ba’zi qismlarida ko‘chish kuzatilgan — tog‘ jinslari 1,8 metrga gorizontal ravishda siljigan. Ushbu hodisa uzunligi 50 km, kengligi 20 km bo‘lgan yer maydonida kuzatilgan.
Tog‘ jinslari, shuningdek, yer yuzasining siljishi va ko‘chishini seysmologlar nazorat nuqtalariga o‘rnatilgan maxsus datchiklar yordamida o‘lchaydi. Masalan, eng ko‘p zarar ko‘rgan aholi punktlaridan biri — Minamiaso qishlog‘ida ushbu uskunalar yer bilan birga 97 santimetrga siljigan, shuningdek, 23 santimetrga ko‘tarilgan.
So‘nggi ma’lumotlarga ko‘ra, Yaponiya janubi-g‘arbini larzaga solgan yerosti silkinishlari qurbonlari soni 41 kishiga yetdi. 2 mingdan ziyod kishi kasalxonaga yotqizildi, ulardan kamida 170 kishining holati og‘ir.
Izoh (0)