Amerikaning Vermont shtatidan demokratchi senator Berni Sanders tarafdorlari uning saylovoldi poygasidagi raqibi — AQSh sobiq davlat kotibi Hillari Klintonning kortejiga bir dollarlik banknotlarni sochdi, deya xabar bermoqda “TASS”.
Hodisa Los-Anjeles yaqinida, Klinton uning nomzodini qo‘llab-quvvatlayotgan aktyor Jorj Kluni va uning rafiqasi Amal bilan saylov kampaniyasi ehtiyojlari uchun mablag‘ yig‘ish bo‘yicha tadbirga ketayotganida sodir bo‘ldi. Sobiq davlat kotibi bilan uchrashish uchun chipta istovchilarga 33,4 ming dollarga tushdi.
Aksiya ishtirokchilaridan biri jurnalistlarga ma’lum qilishicha, ularning maqsadi siyosatchilarga targ‘ibot kampaniyalarini moliyalashtirish uchun badavlat kishilardan yirik mablag‘lar qabul qilish imkonini beruvchi Amerika qonunlarining bema’niligini ko‘rsatib berishdan iborat bo‘lgan. Aktivistlar Klintonning kortejiga taxminan mingta kupyurani yog‘dirdi.
Avvalroq Sanders va uning tarafdorlari Klintonni korporatsiyalardan mablag‘ olishda ko‘p bora ayblagan edi, bu, ularning fikricha, Klintonni biznesdan manfaatdor qilib qo‘yadi.
Izoh (0)