Xitoylik arxeologlar Sichuan provinsiyasida qadimgi mozorni aniqladi, deb yozadi “TASS”. U yerdan topilgan murdalar so‘nggi tosh asri — neolitga tegishli bo‘lib, ularning yoshi 4,5 ming yilga tengdir.
Mozor qadimgi shaharlardan biriga tegishli bo‘lgan. Ko‘plab qabrlar bir-biriga zich tarzda joylashgan. Murdalar yer osti suvlari sathidan pastda bo‘lgani tufayli, ularga havo yetib bormagan, natijada ular yaxshi saqlangan.
Qabriston olimlar uchun qimmatli topilma bo‘ldi, u Chendu platosida ayni paytgacha aniqlangan bunday turdagi obyektning eng qadimiysi hisoblanadi.
Arxeologlar jasadlar ko‘p sonli tosh buyumlar, sopol idishlar, fil suyagidan yasalgan taqinchoqlar, pichoqlar, boltalar va boshqa qadimiy buyumlar bilan birga ko‘milgan 89 ta qabrni topishga ulgurdi. Bundan tashqari, qabrlarda guruch, tariq va boshqa don ekinlari bo‘lgan, bu o‘sha vaqtda qishloq xo‘jaligi taraqqiy etganidan darak beradi.
Arxeologlar ta’kidlashicha, ular DNK testlari va boshqa tadqiqotlar yordamida neolit davri odamlarining jismoniy rivojlanganligi, salomatligi, kasalliklari haqida ma’lumotlar olmoqchi. Shuningdek, suyaklarni kimyoviy tahlil qilish orqali yuqori darajadagi aniqlikda tosh asri odamlarining ratsionini bilib olish mumkin bo‘ladi.
Izoh (0)