15 апрелдан 16 апрелга ўтар кечаси Япония жануби-ғарбидаги Кюсю оролини ларзага келтирган 7,3 магнитудали зилзила Футагава ёриғи ҳудудида тоғ жинслари деярли икки метрга силжиши оқибатида содир бўлган. Бундай хулосага япониялик сейсмолог олимлар келди, деб ёзади «ТАСС».

Уларнинг фикрича, Футагава ёриғининг баъзи қисмларида кўчиш кузатилган — тоғ жинслари 1,8 метрга горизонталь равишда силжиган. Ушбу ҳодиса узунлиги 50 км, кенглиги 20 км бўлган ер майдонида кузатилган.

Тоғ жинслари, шунингдек, ер юзасининг силжиши ва кўчишини сейсмологлар назорат нуқталарига ўрнатилган махсус датчиклар ёрдамида ўлчайди. Масалан, энг кўп зарар кўрган аҳоли пунктларидан бири — Минамиасо қишлоғида ушбу ускуналар ер билан бирга 97 сантиметрга силжиган, шунингдек, 23 сантиметрга кўтарилган.

Сўнгги маълумотларга кўра, Япония жануби-ғарбини ларзага солган ерости силкинишлари қурбонлари сони 41 кишига етди. 2 мингдан зиёд киши касалхонага ётқизилди, улардан камида 170 кишининг ҳолати оғир.