Futbol bo‘yicha O‘zbekiston milliy terma jamoasi hamda Rossiyaning “Krasnodar” klubi yarim himoyachisi Odil Ahmedov krasnodarliklarning joriy mavsumdagi imkoniyatlari haqida to‘xtalib o‘tdi, deb xabar beradi “Chempionat”.
“Rossiya Kubogi yarim finalida SSKA bilan o‘ynaymiz. Ushbu o‘yinga jiddiy tarzda tayyorgarlik ko‘ryapmiz va kubokni qo‘lga kiritishni xohlaymiz. Rossiya chempionati yakunlanishiga esa hali yettita tur qolgan bo‘lib, birinchi va beshinchi o‘rinlarni egallab turgan jamoalar o‘rtasidagi farq atigi 6 ochkoni tashkil qilmoqda. Chempionlik uchun kurash? Hamma narsa bo‘lishi mumkin. O‘z o‘yinimizni namoyish qilsak, natijaga erishamiz”, – dedi Odil Ahmedov.
Shuningdek, o‘zbekistonlik futbolchi “Krasnodar”ning Yevropa Ligasidagi muvaffaqiyatsizligiga izoh berdi.
“Yevropa Ligasi 1/16 finalida ‘Sparta’dan o‘ta olmaganimiz sababi, bunday o‘yinlarda bitta gol barcha narsani hal qilishi mumkin. Safar o‘yinida aynan shunday bo‘ldi. O‘z maydonimizda o‘tgan o‘yinning birinchi bo‘limini yaxshi o‘tkazib, ikkinchi bo‘limda chexlar gol urganida taslim bo‘ldik. Shundan so‘ng yana ikkita gol o‘tkazib yubordik. Bunday paytlarda ‘Sparta’ singari tartibli jamoalarga qarshi biror narsa qo‘llash qiyin”, – deya qo‘shimcha qildi Ahmedov.
Ma’lumot uchun, Rossiya chempionati 24-turidan so‘ng “Krasnodar” 43 ochko to‘plagan holda turnir jadvalining 5-pog‘onasini egallab turibdi. “Rostov” jamoasi 48 ochko bilan Rossiya chempionatida peshqadamlik qilmoqda.
Izoh (0)