Футбол бўйича Ўзбекистон миллий терма жамоаси ҳамда Россиянинг «Краснодар» клуби ярим ҳимоячиси Одил Аҳмедов краснодарликларнинг жорий мавсумдаги имкониятлари ҳақида тўхталиб ўтди, деб хабар беради «Чемпионат».
«Россия Кубоги ярим финалида ЦСКА билан ўйнаймиз. Ушбу ўйинга жиддий тарзда тайёргарлик кўряпмиз ва кубокни қўлга киритишни хоҳлаймиз. Россия чемпионати якунланишига эса ҳали еттита тур қолган бўлиб, биринчи ва бешинчи ўринларни эгаллаб турган жамоалар ўртасидаги фарқ атиги 6 очкони ташкил қилмоқда. Чемпионлик учун кураш? Ҳамма нарса бўлиши мумкин. Ўз ўйинимизни намойиш қилсак, натижага эришамиз», – деди Одил Аҳмедов.
Шунингдек, ўзбекистонлик футболчи «Краснодар»нинг Европа Лигасидаги муваффақиятсизлигига изоҳ берди.
«Европа Лигаси 1/16 финалида ‘Спарта’дан ўта олмаганимиз сабаби, бундай ўйинларда битта гол барча нарсани ҳал қилиши мумкин. Сафар ўйинида айнан шундай бўлди. Ўз майдонимизда ўтган ўйиннинг биринчи бўлимини яхши ўтказиб, иккинчи бўлимда чехлар гол урганида таслим бўлдик. Шундан сўнг яна иккита гол ўтказиб юбордик. Бундай пайтларда ‘Спарта’ сингари тартибли жамоаларга қарши бирор нарса қўллаш қийин», – дея қўшимча қилди Аҳмедов.
Маълумот учун, Россия чемпионати 24-туридан сўнг «Краснодар» 43 очко тўплаган ҳолда турнир жадвалининг 5-поғонасини эгаллаб турибди. «Ростов» жамоаси 48 очко билан Россия чемпионатида пешқадамлик қилмоқда.
Изоҳ (0)