Toshkentda fuqarolar yig‘inlari raislari va ularning maslahatchilari sayloviga tayyorgarlik ko‘rish hamda o‘tkazishning dolzarb masalalariga bag‘ishlangan ilmiy-amaliy konferensiya bo‘lib o‘tdi. Bu haqda O‘zA xabar bermoqda.
Xalq deputatlari Toshkent shahar Kengashining fuqarolar yig‘inlari raislari (oqsoqollari) va ularning maslahatchilari saylovini tashkil etish hamda o‘tkazishga ko‘maklashuvchi komissiyasi, Toshkent shahar hokimligi huzuridagi fuqarolarning o‘zini o‘zi boshqarish organlari xodimlarining malakasini oshirish bo‘yicha o‘quv kurslari tomonidan tashkil etilgan tadbirda O‘zbekiston Respublikasi Oliy Majlisi Senati va Qonunchilik palatasi, O‘zbekiston Respublikasi Prezidenti huzuridagi Davlat boshqaruvi akademiyasi vakillari, davlat va jamoat tashkilotlari xodimlari, mahallalar faollari ishtirok etdi.
O‘zbekiston Respublikasi Oliy Majlisi Senatining Qonunchilik va sud-huquq masalalari qo‘mitasi raisi B.Matmurodov, xalq deputatlari Toshkent shahar Kengashining fuqarolar yig‘inlari raislari (oqsoqollari) va ularning maslahatchilari saylovini tashkil etish hamda o‘tkazishga ko‘maklashuvchi komissiyasi raisi R.Saidahmedov va boshqalar “Kuchli davlatdan – kuchli fuqarolik jamiyati sari” tamoyili muhim ahamiyat kasb etayotganini ta’kidladi.
Fuqarolar yig‘inlari raislari va ularning maslahatchilari sayloviga puxta tayyorgarlik ko‘rish va uni yuqori saviyada tashkil qilish yuzasidan Toshkent shahridagi 505 mahallaga hamda saylovda ishtirok etuvchi boshqa subyektlarga saylov jarayonida o‘z ishlarini tizimli va samarali tashkil qilishda amaliy yordam ko‘rsatilmoqda.
Konferensiyada “Fuqarolar yig‘inlari raislari (oqsoqollari) va ularning maslahatchilari saylovi to‘g‘risida”gi qonunning mazmun-mohiyatiga oid ma’ruzalar tinglandi. Saylovni tashkil etish va o‘tkazishga ko‘maklashuvchi komissiyaning vazifalari, ishchi guruhning vazifa va vakolatlari bo‘yicha batafsil tushuntirish berildi.
Izoh (0)