O‘zbekiston Respublikasi Prezidenti Islom Karimov 14-aprel, payshanba kuni Shanxay hamkorlik tashkilotiga a’zo davlatlar Xavfsizlik kengashlari rahbarlari, shuningdek, ShHT Bosh kotibi va ShHT Mintaqaviy aksilterror tuzilmasi Ijroiya qo‘mitasi direktori bilan uchrashdi. Bu haqda O‘zA xabar bermoqda.
Davlat rahbari mehmonlarni samimiy qutlar ekan, Shanxay hamkorlik tashkiloti o‘n besh yillik faoliyati davomida nufuzli va samarali xalqaro tashkilot sifatida mustahkam qaror topgani, uning faoliyati tinchlik, barqarorlik va xavfsizlikni mustahkamlashga xizmat qilayotganini e’tirof etdi.
O‘zbekiston tashabbusi bilan 2004-yilda tashkil etilgan, ShHTning muhim va samarali instituti bo‘lgan Xavfsizlik kengashlari kotiblari yig‘ilishi tashkilot hududida xavfsizlik va barqarorlikni mustahkamlash bo‘yicha tomonlar faoliyatini muvofiqlashtirib borishda muhim vazifani bajarib kelmoqda.
Prezident Shanxay hamkorlik tashkiloti mamlakatlari hududida terrorizm, ekstremizm va separatizm ko‘rinishlari, shuningdek, boshqa tahdid va xavf-xatarlarning oldini olish, ularni bartaraf etish borasida muhim qarorlar ishlab chiqish va amalga oshirishda ShHT Mintaqaviy aksilterror tuzilmasi ham alohida o‘rin tutayotganini ta’kidladi.
Qozog‘iston, Xitoy, Qirg‘iziston, Rossiya va Tojikiston delegatsiyalari rahbarlari Shanxay hamkorlik tashkilotiga a’zo davlatlar Xavfsizlik kengashlari kotiblarining Toshkentda o‘tkazilgan o‘n birinchi yig‘ilishida muhokama qilingan masalalar yuzasidan mulohazalarini keltirib o‘tdi, samimiy qabul uchun Prezidentga minnatdorlik bildirdi.
Izoh (0)