Toshkentda inson koinotga parvoz etganiga 55 yil to‘lishiga bag‘ishlangan tadbirlar bo‘lib o‘tdi

12-aprel, seshanba kuni Toshkentda inson ilk bor koinotga parvoz qilgani (1961-yil 12-aprel)ga 55 yil to‘lishi munosabati bilan bir qator tadbirlar bo‘lib o‘tdi. Bu haqda “Gazeta.uz” xabar bermoqda.

Poytaxtning Chilonzor tumanidagi Yuriy Gagarin nomli maydonga davlat va jamoat tashkilotlari vakillari, diplomatlar, faxriylar va o‘quvchilar to‘plandi. Ularni Rossiya Federatsiyasining O‘zbekistondagi Favqulodda va muxtor elchisi Vladimir Tyurdenev qutladi.

“Koinotni o‘zlashtirishda sobiq Ittifoqning barcha xalqlari, jumladan, O‘zbekiston vakillari ham ishtirok etgan. Hozirda ham koinotni tadqiq etishda Rossiya va O‘zbekiston hamkorlik qilmoqda. ‘Suffa’ radioobservatoriyasining barpo etilishi buning dalili bo‘la oladi”, — deya ta’kidladi elchi.

Sanaga bag‘ishlangan yana bir tadbir Toshkent politexnika muzeyida bo‘lib o‘tdi. “Rossotrudnichestvo”ning O‘zbekistondagi vakolatxonasi va “Madaniyatlar muloqoti — Yagona dunyo” xalqaro xayriya fondi tashabbusi bilan muzeyga Yuriy Gagarinning ukrainalik haykaltarosh Aleksey Leonov ishlagan bronza byusti sovg‘a qilindi. Taniqli suxandon, O‘zbekiston Respublikasida xizmat ko‘rsatgan artist Galina Melnikova muzeyga o‘zi intervyu olgan mashhur kosmonavtlarning noyob fotosuratlarini taqdim etdi.