12 апрель, сешанба куни Тошкентда инсон илк бор коинотга парвоз қилгани (1961 йил 12 апрель)га 55 йил тўлиши муносабати билан бир қатор тадбирлар бўлиб ўтди. Бу ҳақда «Газета.uz» хабар бермоқда.
Пойтахтнинг Чилонзор туманидаги Юрий Гагарин номли майдонга давлат ва жамоат ташкилотлари вакиллари, дипломатлар, фахрийлар ва ўқувчилар тўпланди. Уларни Россия Федерациясининг Ўзбекистондаги Фавқулодда ва мухтор элчиси Владимир Тюрденев қутлади.
«Коинотни ўзлаштиришда собиқ Иттифоқнинг барча халқлари, жумладан, Ўзбекистон вакиллари ҳам иштирок этган. Ҳозирда ҳам коинотни тадқиқ этишда Россия ва Ўзбекистон ҳамкорлик қилмоқда. ‘Суффа’ радиообсерваториясининг барпо этилиши бунинг далили бўла олади», — дея таъкидлади элчи.
Санага бағишланган яна бир тадбир Тошкент политехника музейида бўлиб ўтди. «Россотрудничество»нинг Ўзбекистондаги ваколатхонаси ва «Маданиятлар мулоқоти — Ягона дунё» халқаро хайрия фонди ташаббуси билан музейга Юрий Гагариннинг украиналик ҳайкалтарош Алексей Леонов ишлаган бронза бюсти совға қилинди. Таниқли сухандон, Ўзбекистон Республикасида хизмат кўрсатган артист Галина Мельникова музейга ўзи интервью олган машҳур космонавтларнинг ноёб фотосуратларини тақдим этди.
Изоҳ (0)