Toshkentning Furqat ko‘chasidan Sebzor ko‘chasiga olib chiquvchi tunnelda yuz bergan yo‘l-transport hodisasi haqida “Voditeli Tashkenta (Drivers.uz)” guruhida fotoxabar qoldirgan foydalanuvchi tanqid ostida qoldi.
Foydalanuvchi tomonidan qoldirilgan xabar fotolari avtobus salonidan, aniqrog‘i, haydovchi kabinasidan olingani yaqqol seziladi. Muallifning Facebook’dagi sahifasida uning avtobus rulida o‘tirib tushgan surati, shuningdek, 118-yo‘nalishda harakatlanuvchi Mercedes-Benz avtobusining old tomondan olingan fotosini topish mumkin.
Shundan kelib chiqib, “Voditeli Tashkenta (Drivers.uz)” guruhi a’zolari YTH suratlari harakatlanib ketayotgan avtobus haydovchisi tomonidan olingan, deb taxmin qilgan va uni tanqid ostiga olgan. “Avariya bo‘lgani yomon, albatta. Biroq, e’tibor bering, suratni avtobus haydovchisi rulda o‘tirgan vaqtida olgan”, — deb yozadi bir foydalanuvchi.
“Mavzuni o‘zgartiramiz. Endi avtobus haydovchilarini muhokama qilamiz”, — deb yozgan foydalanuvchiga javoban, boshqasi: “Albatta, avtobus haydovchilarini muhokama qilish shart! Ular qanday yurishini ko‘rganmisiz? Mana hozir — o‘zi suratga olib, o‘zi Facebook’ga joylashtirgan. Qachon? Bekatlar oralig‘idami yoki svetoforda?”, — deb javob bergan.
Avvalroq Toshkentning Furqat ko‘chasidan Sebzor ko‘chasiga olib chiquvchi tunnel oxirida Matiz avtomobili ag‘darilib ketgani haqida xabar berilgan edi. Hodisa 11-aprel, dushanba kuni tonggi soat 5:00—5:45 oralig‘ida yuz bergan.
Ma’lumot uchun, transport vositasini boshqarish vaqtida haydovchilarning telefondan foydalanishi eng kam ish haqining ikki baravari miqdorida (11-aprel holatiga — 260 480 so‘m) jarima solinishiga sabab bo‘ladi. Xuddi shunday huquqbuzarlik ma’muriy jazo qo‘llanilganidan keyin bir yil davomida takror sodir etilgan bo‘lsa, haydovchi eng kam ish haqining uch baravari miqdorida (390 720 so‘m) jarimaga tortiladi yoki transport vositasini boshqarish huquqidan olti oy muddatga mahrum etiladi.
Izoh (0)