Тошкентнинг Фурқат кўчасидан Себзор кўчасига олиб чиқувчи туннелда юз берган йўл-транспорт ҳодисаси ҳақида «Водители Ташкента (Drivers.uz)» гуруҳида фотохабар қолдирган фойдаланувчи танқид остида қолди.
Фойдаланувчи томонидан қолдирилган хабар фотолари автобус салонидан, аниқроғи, ҳайдовчи кабинасидан олингани яққол сезилади. Муаллифнинг Facebook’даги саҳифасида унинг автобус рулида ўтириб тушган сурати, шунингдек, 118-йўналишда ҳаракатланувчи Mercedes-Benz автобусининг олд томондан олинган фотосини топиш мумкин.
Шундан келиб чиқиб, «Водители Ташкента (Drivers.uz)» гуруҳи аъзолари ЙТҲ суратлари ҳаракатланиб кетаётган автобус ҳайдовчиси томонидан олинган, деб тахмин қилган ва уни танқид остига олган. «Авария бўлгани ёмон, албатта. Бироқ, эътибор беринг, суратни автобус ҳайдовчиси рулда ўтирган вақтида олган», — деб ёзади бир фойдаланувчи.
«Мавзуни ўзгартирамиз. Энди автобус ҳайдовчиларини муҳокама қиламиз», — деб ёзган фойдаланувчига жавобан, бошқаси: «Албатта, автобус ҳайдовчиларини муҳокама қилиш шарт! Улар қандай юришини кўрганмисиз? Мана ҳозир — ўзи суратга олиб, ўзи Facebook’га жойлаштирган. Қачон? Бекатлар оралиғидами ёки светофорда?», — деб жавоб берган.
Аввалроқ Тошкентнинг Фурқат кўчасидан Себзор кўчасига олиб чиқувчи туннел охирида Matiz автомобили ағдарилиб кетгани ҳақида хабар берилган эди. Ҳодиса 11 апрель, душанба куни тонгги соат 5:00—5:45 оралиғида юз берган.
Маълумот учун, транспорт воситасини бошқариш вақтида ҳайдовчиларнинг телефондан фойдаланиши энг кам иш ҳақининг икки баравари миқдорида (11 апрель ҳолатига — 260 480 сўм) жарима солинишига сабаб бўлади. Худди шундай ҳуқуқбузарлик маъмурий жазо қўлланилганидан кейин бир йил давомида такрор содир этилган бўлса, ҳайдовчи энг кам иш ҳақининг уч баравари миқдорида (390 720 сўм) жаримага тортилади ёки транспорт воситасини бошқариш ҳуқуқидан олти ой муддатга маҳрум этилади.
Изоҳ (0)