Facebook’dagi “Voditeli Tashkenta (Drivers.uz)” guruhi a’zosi Toshkent shahrining Qoraqamish dahasida 7-aprel kuni yuz bergan e’tiborga molik holatning videosini e’lon qildi. Videoyozuv Matiz’ning harakatlaridan jabrlangan haydovchining avtomobilidagi videoregistrator yordamida olingan.
Videoning boshida svetoforning yashil chirog‘idan so‘ng jabrlanuvchi mashinasini o‘z yo‘nalishi bo‘ylab o‘ngga, qarama-qarshi qatnov qismidan kelayotgan, davlat raqam belgisi 10 N 713 CA bo‘lgan, orqa oynasiga “O‘” va “Diqqat, gaz” ogohlantiruvchi belgilari yopishtirilgan Matiz avtomobili esa chapga burilib, jabrlanuvchi haydovchining yo‘lini to‘sgani va bekatdan yo‘lovchi chiqarayotganini ko‘rish mumkin.
Matiz haydovchisi xaridor bilan kelishib, uni avtomobiliga o‘tkazgunicha, jabrlanuvchi avtomobil egasi kutib turgan. Matiz shundan keyin ham yurmay, jabrlanuvchining harakatiga xalal berishga uringan. Jabrlanuvchi Matiz’ni o‘ngdan aylanib o‘tishga harakat qilganida, Matiz uning yo‘lini kesib, ichida ikki yo‘lovchi borligiga qaramay, keskin harakatlarni amalga oshirgan.
Video muallifining qo‘shimcha qilishicha, u keyingi svetoforda Matiz’ga yetib olgan va mashinasidan tushib, haydovchi bilan gaplashgan. “U xuddi hech narsa bo‘lmagandek o‘zini jinnilikka soldi. Keyin, darhol joyidan qo‘zg‘alib: ‘Qanday xohlasam, shunday haydayman’, deb ketdi”, — deb yozadi video muallifi.
Videoxabar ostida fikr bildirgan foydalanuvchilar Matiz haydovchisining harakatlarini keskin tanqid ostiga olgan, ayni vaqtda, video muallifining sabr-toqatiga qoyil qolgan. “Sabringiz temirbetondan ekan”, — deb ta’rif bergan guruh a’zolaridan biri. Videoxabarga besh soat ichida 400 ga yaqin komment qoldirdi.
Izoh (0)