Liviyaning BMTdagi vakili Ibrohim Dabbashi Xavfsizlik kengashiga mamlakat suveren fondidan (Lybian Investment Authority, LIA) sanksiyalar olib tashlanishini so‘ralgan maktub yo‘lladi. Diplomatning aytishicha, fond samarali boshqarilmayotgani uchun milliardlab dollarlarni yo‘qotmoqda, deya xabar beradi “RBK”.
Dabbashining ta’kidlashicha, fond 2014-yilning o‘zida 721 million dollar yo‘qotgan. Investitsiyalardan dividend sifatida olish mumkin bo‘lgan jami 1,6—2,3 milliard dollardan mahrum bo‘lgan. Maktubda Liviya hukumati mazkur aktivlardan foydalanish niyatida emasligi, faqat fonddagi mablag‘lar hajmi kelgusida ham kamaymasligiga ishonchi komil bo‘lishini istayotganligi bildirilgan. Xavfsizlik kengashidan LIA hisob raqamlarini ochish va yopish, ular o‘rtasida tranzaksiyalar o‘tkazishga imkon beruvchi rezolyutsiya qabul qilish so‘ralgan.
LIA 2006-yilda tuzilgan bo‘lib, o‘sha paytda uning hisob raqamlarida 70 milliard dollar atrofida bo‘lgan (hozirda 67 milliard dollar ekanligi aytilmoqda). Fond mamlakat yetakchisi Muammar Qaddafiy va uning oilasi to‘g‘ridan-to‘g‘ri nazorati ostida bo‘lgan. 2011-yil martida undagi mablag‘lar olib chiqib ketilishiga yo‘l qo‘ymaslik uchun BMT qaroriga ko‘ra LIA aktivlari muzlatib qo‘yilgandi.
Izoh (0)