Ливиянинг БМТдаги вакили Иброҳим Даббаши Хавфсизлик кенгашига мамлакат суверен фондидан (Lybian Investment Authority, LIA) санкциялар олиб ташланишини сўралган мактуб йўллади. Дипломатнинг айтишича, фонд самарали бошқарилмаётгани учун миллиардлаб долларларни йўқотмоқда, дея хабар беради «РБК».
Даббашининг таъкидлашича, фонд 2014 йилнинг ўзида 721 миллион доллар йўқотган. Инвестициялардан дивиденд сифатида олиш мумкин бўлган жами 1,6—2,3 миллиард доллардан маҳрум бўлган. Мактубда Ливия ҳукумати мазкур активлардан фойдаланиш ниятида эмаслиги, фақат фонддаги маблағлар ҳажми келгусида ҳам камаймаслигига ишончи комил бўлишини истаётганлиги билдирилган. Хавфсизлик кенгашидан LIA ҳисоб рақамларини очиш ва ёпиш, улар ўртасида транзакциялар ўтказишга имкон берувчи резолюция қабул қилиш сўралган.
LIA 2006 йилда тузилган бўлиб, ўша пайтда унинг ҳисоб рақамларида 70 миллиард доллар атрофида бўлган (ҳозирда 67 миллиард доллар эканлиги айтилмоқда). Фонд мамлакат етакчиси Муаммар Қаддафий ва унинг оиласи тўғридан-тўғри назорати остида бўлган. 2011 йил мартида ундаги маблағлар олиб чиқиб кетилишига йўл қўймаслик учун БМТ қарорига кўра LIA активлари музлатиб қўйилганди.
Изоҳ (0)