Ukrainada, Belarus bilan chegara yaqinida “Yanstrong” transport kompaniyasiga (Belarus) tegishli yuk mashinasidan sirk fili qochib ketdi. Ayni paytda u Ukraina hududidagi o‘rmonda yashiringan bo‘lishi mumkin, deya ma’lum qiladi “Interfaks”.
Yuk mashinasi haydovchisining ma’lum qilishicha, 29-mart, seshanba kuni 15 yoshli fil Ukraina hududi orqali Belarusga yetkazish uchun Vengriyada avtomobilga yuklangan. Sirk vakillari transport kompaniyasini safar jonivor uchun stressga sabab bo‘lishi mumkinligi haqida ogohlantirgan. 31-mart, payshanba kuni ertalab, Ukraina hududini kesib o‘tib, Belarus chegarasiga yaqinlashayotganda haydovchi transport vositasini ko‘zdan kechirish uchun to‘xtaydi. Shu paytda fil eshikni buzib, o‘rmon tarafga qochib ketadi
“Bunday hodisa amaliyotimizda birinchi bor ro‘y berishi. Yaqinda Ukraina sirki uchun hayvonlarni olib kelgandik, hech qanday muammo bo‘lmagandi. Qanday yo‘l tutish haqida bir qarorga kelish uchun Vengriya sirki va Ukraina chegara xizmati bilan bog‘landik. Nima bo‘lganda ham, yuk sug‘urta qilingan va jonivorni qidirish bilan professionallar shug‘ullanmoqda. Yaqin orada qochoq filni topishimizga ishonchimiz komil”, — deya ta’kidlagan “Yanstrong” vakili.
Izoh (0)