KXDR rahbari Kim Chen In ko‘rsatmasiga binoan shimoliy koreyalik mutaxassislar qit’alararo ballistik raketa jangovar kallagi uchligi haroratga bardoshliligini sinovdan o‘tkazdi. Bu haqda Koreya Markaziy telegraf agentligi manbalariga tayanib, “TASS” xabar bermoqda.
Agentlikning bildirishicha, ushbu sinovlar natijasida “mamlakatda mahalliy texnologiyalar asosida ishlab chiqilgan issiqlikka bardoshli materiallar qit’alararo ballistik raketa jangovar kallagi orbitadan atmosferaning zich qatlamlariga qaytishi va nishonni mo‘ljalga olishini ishonchli kafolatlashi ma’lum bo‘ldi”.
Kim Chen In sinov natijalaridan qoniqish bildirgan va “KXDR faqat bir necha yirik harbiy davlatlar egallagan texnologiyani yaratgani va shu tariqa ballistik raketalar ishlab chiqarishda katta yutuqqa erishgani”ni ta’kidlagan.
Izoh (0)