AQSh prezidenti Barak Obama va Rossiya prezidenti Vladimir Putin telefon suhbati davomida Rossiya qo‘shinlarini Suriyadan chiqarib ketishni boshlash haqidagi qarorni muhokama qildi. Bu haqda Oq uy tarqatgan xabarda aytiladi, deb yozadi “TASS”.
“Ular prezident Putinning bugungi Rossiya qurolli kuchlarini Suriyadan qisman chiqarib ketish haqidagi bayonotini, shuningdek, nizolarni tartibga solish haqidagi siyosiy muzokaralarda olg‘a siljish maqsadida jangovar harakatlarni to‘liq tugatishni ta’minlash uchun zarur bo‘lgan navbatdagi qadamlarni muhokama qildi”, — deyiladi hujjatda.
Obama siyosiy o‘tishni amalga oshirish uchun Suriyada zo‘ravonlikka chek qo‘yish kerakligini ta’kidladi, shuningdek, Damashq gumanitar yordam uchun to‘siqsiz imkoniyatni taqdim etishi kerakligini qayd etdi.
Eslatib o‘tamiz, avvalroq Rossiya Federatsiyasi prezidenti Vladimir Putin Rossiya qo‘shinlarini Suriyadan olib chiqishni boshlashga buyruq bergani xabar qilingan edi.
Izoh (0)