Rossiya va Qozog‘istonda yo‘lning xavfli qismlaridagi yo‘l-transport hodisalari sonini kamaytirish maqsadida yo‘l yoqalariga va piyodalar o‘tish joylariga bolalar va o‘quvchilarning maketlarini ommaviy joylashtirish ishlari olib borildi. Facebook foydalanuvchilaridan biri mazkur tajribani O‘zbekistonda tatbiq etish imkoniyati va samarasi yuzasidan “Voditeli Tashkenta (Drivers.uz)” guruhi a’zolariga murojaat qildi.
“G‘oya bunday: haydovchi uzoqdan rangli maketni ko‘radi va uni bola deb o‘ylaydi, shu yo‘l bilan e’tiborni oshirish va tezlikni cheklash samarasiga erishiladi. Nima deb o‘ylaysiz, Toshkentda ham shunday maketlar o‘rnatilsa, kutilganidek samara beradimi? Joriy etishdan avval, jamoatchilik fikrini o‘rganishga qaror qildik”, — deb yozadi foydalanuvchi (mavzuni boshlagan foydalanuvchi o‘zining qayerda ishlashini ma’lum qilmagan).
“Voditeli Tashkenta (Drivers.uz)”ning bir qator foydalanuvchilari bu tashabbusni ma’qullagan, ba’zi foydalanuvchilar bunday maketlar nur qaytaruvchan bo‘lishi ham kerakligini ta’kidlagan. Shuningdek, bir guruh foydalanuvchilar bolalar maketi o‘rniga tayoqcha ko‘targan yo‘l nazoratchisi maketini joylashtirish samaraliroq ekani haqida fikr bildirgan.
Ayni vaqtda ko‘plab foydalanuvchilar maktab va bolalar bog‘chalari oldiga bunday maketlarning o‘rnatilishiga qat’iy qarshi chiqqan. “Haydovchilar bola aslida maket ekanligini bilib, bunga o‘rganib qolsa, keyinchalik tirik piyodalarga ham e’tibor bermay, uni bosib ketishi ham mumkin”, — deb yozadi foydalanuvchilardan biri.
Tashabbusga qarshi chiqqan foydalanuvchilar o‘rnatilgan yo‘l belgilari (misol uchun, “Bolalar”, “Tezlik cheklangan” va h.k.)ga rioya etmagan haydovchi maketlarga ham parvo qilmasligini ta’kidlagan. Ularning fikricha, bunday maketlarni o‘rnatish o‘rniga qoidabuzarliklar uchun jarimalar miqdorini sezilarli oshirish va asosan bolalar o‘tadigan piyodalar o‘tish joylarini qatnov qismiga nisbatan balandroq qilib qurish (“lejachiy politseyskiy”) kerak.
Izoh (0)