Россия ва Қозоғистонда йўлнинг хавфли қисмларидаги йўл-транспорт ҳодисалари сонини камайтириш мақсадида йўл ёқаларига ва пиёдалар ўтиш жойларига болалар ва ўқувчиларнинг макетларини оммавий жойлаштириш ишлари олиб борилди. Facebook фойдаланувчиларидан бири мазкур тажрибани Ўзбекистонда татбиқ этиш имконияти ва самараси юзасидан «Водители Ташкента (Drivers.uz)» гуруҳи аъзоларига мурожаат қилди.
«Ғоя бундай: ҳайдовчи узоқдан рангли макетни кўради ва уни бола деб ўйлайди, шу йўл билан эътиборни ошириш ва тезликни чеклаш самарасига эришилади. Нима деб ўйлайсиз, Тошкентда ҳам шундай макетлар ўрнатилса, кутилганидек самара берадими? Жорий этишдан аввал, жамоатчилик фикрини ўрганишга қарор қилдик», — деб ёзади фойдаланувчи (мавзуни бошлаган фойдаланувчи ўзининг қаерда ишлашини маълум қилмаган).
«Водители Ташкента (Drivers.uz)»нинг бир қатор фойдаланувчилари бу ташаббусни маъқуллаган, баъзи фойдаланувчилар бундай макетлар нур қайтарувчан бўлиши ҳам кераклигини таъкидлаган. Шунингдек, бир гуруҳ фойдаланувчилар болалар макети ўрнига таёқча кўтарган йўл назоратчиси макетини жойлаштириш самаралироқ экани ҳақида фикр билдирган.
Айни вақтда кўплаб фойдаланувчилар мактаб ва болалар боғчалари олдига бундай макетларнинг ўрнатилишига қатъий қарши чиққан. «Ҳайдовчилар бола аслида макет эканлигини билиб, бунга ўрганиб қолса, кейинчалик тирик пиёдаларга ҳам эътибор бермай, уни босиб кетиши ҳам мумкин», — деб ёзади фойдаланувчилардан бири.
Ташаббусга қарши чиққан фойдаланувчилар ўрнатилган йўл белгилари (мисол учун, «Диққат, болалар!», «Чекланган тезлик» ва ҳ.к.)га риоя этмаган ҳайдовчи макетларга ҳам парво қилмаслигини таъкидлаган. Уларнинг фикрича, бундай макетларни ўрнатиш ўрнига қоидабузарликлар учун жарималар миқдорини сезиларли ошириш ва асосан болалар ўтадиган пиёдалар ўтиш жойларини қатнов қисмига нисбатан баландроқ қилиб қуриш («лежачий полицейский») керак.
Изоҳ (0)