O‘zbekistonda 2016-yil 1-martdan yangi tahrirdagi Yo‘l harakati qoidalari amal qilishni boshladi. Yangi qoidalarga ko‘ra, haydovchi harakatlanishni boshlanishidan oldin yo‘lovchilarni xavfsizlik kamarini taqib olish haqida ogohlantirish zarur.
Facebook’dagi “Voditeli Tashkenta” guruhi a’zolari Toshkent shahridagi avtomobillarda ko‘ringan xavfsizlik kamarini taqib olish bilan bog‘liq e’lonlarning suratlarini e’lon qildi.
E’lonlarning birida: “Iltimos, ‘remen’ni taqib oling!”, — deb yozilgan va unga xavfsizlik kamari qanday taqilishi ko‘rsatilgan suratchalar ilova qilingan.
“Bunisi litsenziyali taksida olingan fotosurat, barakalla!”, — deb yozadi “Voditeli Tashkenta” guruhi a’zosi boshqa suratni e’lon qilarkan. Ikkinchi e’londa ham yo‘lovchi qaratilgan “Xavfsizlik kamarini taqib oling” talabi o‘zbek va rus tillarida yozilgan.
Yo‘l harakati qoidalarining 9-bandiga muvofiq, konstruksiyasida xavfsizlik kamari nazarda tutilgan transport vositalari harakatlanib borayotganda, haydovchi xavfsizlik kamarini taqib olishi shart. Qoidalarning mazkur bandiga ko‘ra, quyidagi shaxslarga xavfsizlik kamarini taqmaslikka ruxsat beriladi:
- avtomobilning orqa o‘rindig‘idagi 12 yoshgacha bo‘lgan bolalar;
- transport vositasini o‘quvchi boshqarayotgan vaqtda avtomototransport vositasini yoki shahar elektr transportini boshqarishni o‘rgatuvchi amaliy mashg‘ulotlar instruktori;
- homilador ayollar, salomatligi xavfsizlik kamari taqish imkonini bermaydigan bemor yo‘lovchilar;
- orqaga harakatni amalga oshirayotgan haydovchilar;
- aholi punktlarida harakatlanishda — yo‘nalishli taksi haydovchilari, taksining orqa o‘rindig‘idagi yo‘lovchilar;
- aholi punktlarida tashqi qismiga maxsus rangli grafik chizmalar chizilgan transport vositalari haydovchilari va yo‘lovchilari.
Izoh (0)