Farg‘ona viloyatida 8-mart — Xalqaro xotin-qizlar bayrami munosabati bilan barcha turdagi jamoat transportlari xotin-qizlarga bepul xizmat ko‘rsatmoqda. Viloyat hokimligi Axborot xizmati rahbari Jahongir Hotamovning “Daryo”ga ma’lum qilishicha, bu Farg‘ona viloyati hokimligi, Avtomobil va daryo transporti agentligining viloyat hududiy bo‘limi hamda bir qator jamoat tashkilotlari hamkorligida o‘tkazilayotgan e’tibor loyihasi doirasida belgilangan.
8-mart kuni viloyat hududida yo‘nalish avtobuslari, xususiy korxonalarga tegishli aholiga xizmat ko‘rsatuvchi yengil mashinalar ushbu loyihada faol ishtirok etib, xotin-qizlarning uzog‘ini yaqin qilishga o‘z hissalarini qo‘shmoqda.
“Bayram kuni erta tongda kelinlar, nevaralar bilan shahar markaziga dam olgani chiqsak, barcha jamoat transportlari, hatto taksilar ham bepul xizmat ko‘rsatayotganiga guvoh bo‘ldik. Yigitlarning e’tibori va g‘amxo‘rligidan boshimiz osmonga yetdi”, — deydi Farg‘ona shahrida yashovchi onaxon Zarifaxon Boboyeva.
Avvalroq 8-mart bayrami munosabati bilan “Kamolot” yoshlar ijtimoiy harakati Farg‘ona viloyati kengashi tomonidan “Kamolot Taksi” loyihasi tashkil etilgani, mazkur loyiha doirasida xotin-qizlarga bepul transport xizmati ko‘rsatilayotgani haqida xabar berilgan edi.
Izoh (0)