“Turkiston” saroyida 8 mart – Xalqaro xotin-qizlar kuni munosabati bilan tantanali tadbir bo‘lib o‘tdi, deya xabar beradi O‘zA.
5-mart kuni xotin-qizlar tashkilotlari vakillari, turli sohalarida samarali mehnat qilib kelayotgan bir guruh ayollar Mustaqillik maydoniga tashrif buyurdi. Mustaqillik va ezgulik monumenti poyiga gullar qo‘ydi.
Bayram ishtirokchilari Respublika ixtisoslashtirilgan suv sportini rivojlantirish markazida bo‘ldi. Alisher Navoiy nomidagi O‘zbekiston Davlat akademik katta teatrida “Sadoqat” spektaklini tomosha qildi.
Shu kuni “Turkiston” saroyida Xalqaro xotin-qizlar kuni munosabati bilan tantanali tadbir bo‘ldi. Unda turli sohalarda samarali mehnat qilayotgan xotin-qizlar, faxriylar, turli vazirlik va idoralar, jamoat tashkilotlarining vakillari, Zulfiya nomidagi Davlat mukofoti sovrindorlari ishtirok etdi.
Tantanali yig‘ilishni Toshkent shahar hokimi R. Usmonov ochdi.
Prezident Islom Karimovning O‘zbekiston xotin-qizlariga bayram tabrigini Prezidentning Davlat maslahatchisi X. Sultonov o‘qib eshittirdi.
O‘zbekiston Respublikasi Bosh vazirining o‘rinbosari, Respublika Xotin-qizlar qo‘mitasi raisi E.Bositxonova xotin-qizlarning jamiyatdagi mavqeini yuksaltirish, huquq va manfaatlarini ta’minlash, salomatligini mustahkamlash borasida amalga oshirilayotgan ishlarning samaralari haqida so‘zladi.
Tadbirda Prezident Islom Karimov qaroriga muvofiq Zulfiya nomidagi Davlat mukofoti bilan taqdirlangan 14 nafar qizga mukofotlar tantanali ravishda topshirildi.
O‘zbekiston xalq artisti Mirza Azizov, Angren shahridagi Mirzo Ulug‘bek nomidagi mahalla fuqarolar yig‘inining diniy ma’rifat va ma’naviy-axloqiy tarbiya masalalari bo‘yicha maslahatchisi Ra’no Hayitqulova xotin-qizlarni bayram bilan tabrikladi.
Tadbir san’at ustalari va yosh ijrochilarning bayram konserti bilan yakunlandi.
Tantanali tadbirda O‘zbekiston Respublikasi Oliy Majlisi Senati Raisi N.Yo‘ldoshev, Oliy Majlis Qonunchilik palatasi Spikeri N.Ismoilov, O‘zbekiston Respublikasi Bosh vaziri Sh.Mirziyoyev ishtirok etdi.
Izoh (0)