Bu joyni birinchi marta ko‘rganingda, tabiatning osoyishta go‘shalaridan biri, deb o‘ylaysan kishi. Biroq birinchi taassurot odatda aldamchi bo‘ladi: Yangi Janubiy Uelsdagi bu maskan (The Gap burni) o‘z joniga qasd qilganlar makoni sifatida tanilgan, deb yozadi “Marketium”.
O‘z hayotiga nuqta qo‘yishga qaror qilganlarning aksariyati baxtiga yo‘lning narigi betida Don Richi ismli ajoyib bir inson istiqomat qiladi.
U yarim asr davomida o‘nlab odamlarning hayotini saqlab qolgan, shu sababli uni hatto “avstraliyalik qo‘riqchi-farishta” deb ham ta’riflashadi. U umumiy hisobda 400 dan ortiq odamni dahshatli qadamdan saqlab qolgan. Qiziq tomoni, bu borada Don o‘zgacha bir iqtidor sohibi emas va o‘z joniga qasd qilmoqchi bo‘lganlarni qutqarishni so‘rab hech qachon politsiyaga murojaat qilmagan.
Xo‘sh, hayotdan to‘ygan odamlar o‘z qarorini o‘zgartirishi uchun Don Richi nima qiladi? Hayratlanarli hech narsa — u shunchaki ularga samimiy tabassum bilan boqib, bir finjon choy ichishga o‘z uyiga mehmonga taklif qiladi.
The Gap burnida turib, borliqni kuzatish — Don Richining yillar davomida orttirgan odati. U o‘zini g‘alati yoki shubhali tutayotgan kishini ko‘rishi bilan, kitobini yig‘ishtirib, o‘sha inson bilan suhbatlashishga oshiqadi.
U har doim ham odamlar hayotini qutqarib qolish uddasidan chiqmagan, biroq halok bo‘lganlar soni kamroq bo‘lishi uchun har vaqt barcha choralarni ishga soladi. Dianna Gegginsning qizi Don tomonidan qutqarib qolinganlardan.
Ona shunday deydi: “U — farishta! Aksariyat odamlar hech narsa qilmasdan, ortga o‘girilib, o‘z yo‘lida davom etgan bo‘lardi. U esa qizimni eng dahshatli qilmishdan saqlab qolish uchun o‘zida kuch, oqillik va yurakdan iliqlik topa oldi. Uning borligining o‘zi baxt!”.
“Don Richi — haqiqiy ma’noda qahramon va odamlar u haqda bilishlariga loyiq insondir”, — deb xulosa qiladi “Marketium” nashri.
Izoh (0)