Бу жойни биринчи марта кўрганингда, табиатнинг осойишта гўшаларидан бири, деб ўйлайсан киши. Бироқ биринчи таассурот одатда алдамчи бўлади: Янги Жанубий Уэльсдаги бу маскан (The Gap бурни) ўз жонига қасд қилганлар макони сифатида танилган, деб ёзади «Маркетиум».
Ўз ҳаётига нуқта қўйишга қарор қилганларнинг аксарияти бахтига йўлнинг нариги бетида Дон Ричи исмли ажойиб бир инсон истиқомат қилади.
У ярим аср давомида ўнлаб одамларнинг ҳаётини сақлаб қолган, шу сабабли уни ҳатто «австралиялик қўриқчи-фаришта» деб ҳам таърифлашади. У умумий ҳисобда 400 дан ортиқ одамни даҳшатли қадамдан сақлаб қолган. Қизиқ томони, бу борада Дон ўзгача бир иқтидор соҳиби эмас ва ўз жонига қасд қилмоқчи бўлганларни қутқаришни сўраб ҳеч қачон полицияга мурожаат қилмаган.
Хўш, ҳаётдан тўйган одамлар ўз қарорини ўзгартириши учун Дон Ричи нима қилади? Ҳайратланарли ҳеч нарса — у шунчаки уларга самимий табассум билан боқиб, бир финжон чой ичишга ўз уйига меҳмонга таклиф қилади.
The Gap бурнида туриб, борлиқни кузатиш — Дон Ричининг йиллар давомида орттирган одати. У ўзини ғалати ёки шубҳали тутаётган кишини кўриши билан, китобини йиғиштириб, ўша инсон билан суҳбатлашишга ошиқади.
У ҳар доим ҳам одамлар ҳаётини қутқариб қолиш уддасидан чиқмаган, бироқ ҳалок бўлганлар сони камроқ бўлиши учун ҳар вақт барча чораларни ишга солади. Дианна Геггинснинг қизи Дон томонидан қутқариб қолинганлардан.
Она шундай дейди: «У — фаришта! Аксарият одамлар ҳеч нарса қилмасдан, ортга ўгирилиб, ўз йўлида давом этган бўларди. У эса қизимни энг даҳшатли қилмишдан сақлаб қолиш учун ўзида куч, оқиллик ва юракдан илиқлик топа олди. Унинг борлигининг ўзи бахт!».
«Дон Ричи — ҳақиқий маънода қаҳрамон ва одамлар у ҳақда билишларига лойиқ инсондир», — деб хулоса қилади «Маркетиум» нашри.
Изоҳ (0)