Toshkentdagi 14-yo‘nalishdagi to‘rtta avtobusda 3-fevraldan bepul Wi-Fi tarmog‘i ishlay boshladi. Yaqin vaqt ichida 28- va 51-avtobus yo‘nalishlarida ham yo‘lovchilarga shunday xizmat taklif etilishi kutilmoqda.
VOT nashri 14-avtobusdagi Wi-Fi internet tezligini sinovdan o‘tkazdi. “Internet kutilmagan tarzda tez ishlayapti. Albatta, uni optik tolali internetniki bilan taqqoslab bo‘lmaydi, biroq tezlik mobil operatorlarnikidan kam emas”, — deb yozadi nashr.
Qayd etishlaricha, avtobusga chiqib, Wi-Fi tarmoqqa ulanishni yoqishingiz bilan, qurilma avtomatik ravishda avtobus Wi-Fi’iga ulanadi — hech qanday parol kiritish shart emas. “Fayllarni yuklab olish cheklab qo‘yilgan, shu sababli smartfoningizdagi dasturlarni yangilab ololmaysiz”, — deyiladi VOT’dagi xabarda.
“Toshshahartransxizmat” kompaniyasi vakili O‘tkir Ayupovning VOT’ga ma’lum qilishicha, mazkur ijtimoiy loyihada hozircha tezligi soniyasiga 2 megabitga teng bo‘lgan internet taqdim etilmoqda. “Tarmoqdan bir vaqtning o‘zida 100 kishi foydalana oladi”, — deydi Ayupov.
Toshkent avtobuslari uchun internet EVO internet-provayderi tomonidan taqdim etilmoqda. Kompaniya menejeri Farid Ahmedovning ta’kidlashicha, avtobusdagi modem 50 metr radiusgacha internetni tarqata oladi, yaqin vaqt ichida internet tezligi 3 megabitgacha oshiriladi.
Izoh (0)