Тошкентдаги 14-йўналишдаги тўртта автобусда 3 февралдан бепул Wi-Fi тармоғи ишлай бошлади. Яқин вақт ичида 28- ва 51-автобус йўналишларида ҳам йўловчиларга шундай хизмат таклиф этилиши кутилмоқда.
VOT нашри 14-автобусдаги Wi-Fi интернет тезлигини синовдан ўтказди. «Интернет кутилмаган тарзда тез ишлаяпти. Албатта, уни оптик толали интернетники билан таққослаб бўлмайди, бироқ тезлик мобил операторларникидан кам эмас», — деб ёзади нашр.
Қайд этишларича, автобусга чиқиб, Wi-Fi тармоққа уланишни ёқишингиз билан, қурилма автоматик равишда автобус Wi-Fi’ига уланади — ҳеч қандай парол киритиш шарт эмас. «Файлларни юклаб олиш чеклаб қўйилган, шу сабабли смартфонингиздаги дастурларни янгилаб ололмайсиз», — дейилади VOT’даги хабарда.
«Тошшаҳартрансхизмат» компанияси вакили Ўткир Аюповнинг VOT’га маълум қилишича, мазкур ижтимоий лойиҳада ҳозирча тезлиги сониясига 2 мегабитга тенг бўлган интернет тақдим этилмоқда. «Тармоқдан бир вақтнинг ўзида 100 киши фойдалана олади», — дейди Аюпов.
Тошкент автобуслари учун интернет EVO интернет-провайдери томонидан тақдим этилмоқда. Компания менежери Фарид Аҳмедовнинг таъкидлашича, автобусдаги модем 50 метр радиусгача интернетни тарқата олади, яқин вақт ичида интернет тезлиги 3 мегабитгача оширилади.
Изоҳ (0)