Avstraliyalik ayol 2 daqiqada 5 farzandini dunyoga keltirdi

Avstraliyaning Pert shahrida yashovchi ayol ikki daqiqa ichida besh nafar egizak farzandini dunyoga keltirdi, deya xabar bermoqda “Gazeta.ru”.

Kim Tuchchining avvaldan uch bolasi — ikki qizi va bir o‘g‘li bor edi. Ta’kidlanishicha, u turmush o‘rtog‘i bilan oilasi yana bir o‘g‘il farzand bilan kengayishini orzu qilgan. Shifokorlar esa unga egizak farzandlar kutayotganini ma’lum qilgan.

Biroq ultratovushli tekshiruv chog‘ida oila naq besh kishiga ko‘payishi oshkor bo‘lgan: ayol “bolalarni yaxshiroq ko‘rish uchun” qaytadan tekshiruv o‘tkazishni so‘ragan, shunda shifokor unga bir yo‘la besh farzandli bo‘lishini aytgan.

Tuchchining so‘zlariga ko‘ra, o‘sha paytda uning “qo‘lidan kelgan yagona narsa — kulib yuborish bo‘lgan”.

Kim Facebook’dagi sahifasiga joylagan suratdan ma’lum bo‘lishicha, chaqaloqlarning bir nafari o‘g‘il, qolgan to‘rt nafari — qiz.