Melburn shahrida davom etayotgan “Katta Dubulg‘a” turkumiga kiruvchi Avstraliya Ochiq chempionatining o‘smirlar o‘rtasidagi musobaqasida o‘zbekistonlik Jo‘rabek Karimov yarim finalga yo‘llanma oldi, deb xabar beradi “Olamsport”.
Turnirda yettinchi raqam ostida tasniflangan Jo‘rabek chorak final bahsida yaponiyalik Yosuki Vatanukini 6:3, 6:2 hisobida taslim etdi.
Turnirda 13-raqam ostida tasniflangan yapon tennischisi uchinchi davrada musobaqaning ikkinchi raketkasi serbiyalik Miomir Kezmanovichni bahslardan chiqarib yuborgandi. Jo‘rabek Karimovning yarim finaldagi raqibi avstraliyalik Aleks De Minaur bo‘ladi. Musobaqada oltinchi raqam ostida harakat qilayotgan Minaur chorak finalda turnirning uchinchi raketkasi gretsiyalik Stefanos Sitsipasni 6:7, 7:5, 6:0 hisobida mag‘lub etdi.
Eslatib o‘tamiz, Jo‘rabek ilk davrada AQSh vakili Ezikel Klarkni 6:1, 6:3, ikkinchi bosqichda gonkonglik Entoni Tangni 6:4, 6:4, uchinchi davrada esa koreyalik Chang-Yon Oxni 6:4, 6:2 hisobida dog‘da qoldirgan edi.
Jo‘rabek Karimov o‘tgan yilgi natijasini takrorladi. 2015-yilda ham u Avstraliya Ochiq chempionatida yarim finalga qadar yetib kelgandi.
Izoh (0)