“Malaga” stadioni xodimlari 15 yoshli ishqibozdan Messi sovg‘a qilgan futbolkani tortib oldi

Futbol bo‘yicha Ispaniya chempionatining 21-turi doirasidagi “Malaga” —“Barselona” (1:2) o‘yinidan so‘ng mezbon jamoaning yosh ishqibozlaridan biri bilan ko‘ngilsiz hodisa yuz berdi. Bu haqda “Segodnya.ua” xabar bermoqda.

O‘yindan so‘ng 15 yoshli o‘smir maydonga tushib, mehmonlar hujumchisi Lionel Messiga yaqinlashishga muvaffaq bo‘ldi. U argentinalik futbolchini quchoqlab, esdalik uchun futbolkasini oladi. Stadion xavfsizlik xizmati xodimlari o‘smirni maydondan chiqarib yuborib, futbolkani undan tortib oldi.

Bu haqda o‘smirning qo‘shnisi Yoli Yolanda ma’lum qildi. “Uni Kevin deb atashadi, u o‘g‘limning o‘rtog‘i bo‘ladi. Messi unga futbolkasini sovg‘a qildi, xavfsizlik xizmati xodimlari esa uni tortib oldi. Ularning bunga haqqi yo‘q, bolani shunday hadyadan mahrum etib, nimaga erishishdi?”, — deya yozgan Yolanda ijtimoiy tarmoqlarda.