AQShning Michigan shtati Xafton-Taun shahrida bir litr benzin narxi 12,5 sentdan ham pasayib ketdi, deya xabar bermoqda “Gazeta.ru” ABC telekanaliga tayanib.
Shaharda bir gallon (AQSh o‘lchov tizimi bo‘yicha — 3,78 litr) benzin qiymati 47 sentgacha tushdi, bu 10 yil ichidagi eng past ko‘rsatkichdir.
Ekspert so‘zlariga ko‘ra, bu qiymat uchta mahalliy benzin quyish shoxobchasi o‘rtasidagi narxlar urushi natijasida kelib chiqqan. Uning ta’kidlashicha, mamlakatdagi boshqa hech qaysi hudud neft narxi tushishiga bu tarzda javob ko‘rsatgani yo‘q.
“GasBuddy.com” keltirgan ma’lumotlarga ko‘ra, AQSh bo‘yicha bir gallon benzin narxi 18-yanvar kuni o‘rtacha 1,8 dollar (bir litri — 49,9 sent)ni tashkil etgan, bu bir yil avvalgi ko‘rsatkichdan 17 foizga past. Bir litri 12,5 sentga teng benzinni esa faqat Xafton-Taun shahrida sotib olish mumkin bo‘lgan.
Izoh: Xabarning dastlabki tahririda gallon ko‘rsatkichi Britaniya o‘lchov tizimi asosida litrga o‘zgartirilgani sabab (Britaniya o‘lchov tizimi bo‘yicha, bir gallon — 4,54 litr), bir litr benzin narxi 10 sentdan arzonlashgani haqida noaniq axborot berilgan. Buning uchun mushtariylarimizdan uzr so‘raymiz.
Izoh (0)