АҚШнинг Мичиган штати Хафтон-Таун шаҳрида бир литр бензин нархи 12,5 центдан ҳам пасайиб кетди, дея хабар бермоқда «Газета.ru» ABC телеканалига таяниб.
Шаҳарда бир галлон (АҚШ ўлчов тизими бўйича — 3,78 литр) бензин қиймати 47 центгача тушди, бу 10 йил ичидаги энг паст кўрсаткичдир.
Эксперт сўзларига кўра, бу қиймат учта маҳаллий бензин қуйиш шохобчаси ўртасидаги нархлар уруши натижасида келиб чиққан. Унинг таъкидлашича, мамлакатдаги бошқа ҳеч қайси ҳудуд нефть нархи тушишига бу тарзда жавоб кўрсатгани йўқ.
«GasBuddy.com» келтирган маълумотларга кўра, АҚШ бўйича бир галлон бензин нархи 18 январь куни ўртача 1,8 доллар (бир литри — 49,9 цент)ни ташкил этган, бу бир йил аввалги кўрсаткичдан 17 фоизга паст. Бир литри 12,5 центга тенг бензинни эса фақат Хафтон-Таун шаҳрида сотиб олиш мумкин бўлган.
Изоҳ: Хабарнинг дастлабки таҳририда галлон кўрсаткичи Британия ўлчов тизими асосида литрга ўзгартирилгани сабаб (Британия ўлчов тизими бўйича, бир галлон — 4,54 литр), бир литр бензин нархи 10 центдан арзонлашгани ҳақида ноаниқ ахборот берилган. Бунинг учун муштарийларимиздан узр сўраймиз.
Изоҳ (0)