Yilning ilk ikki haftasi mobaynida sayyoraning eng boy 400 kishisi jami 305 milliard dollar yo‘qotdi. 2016-yilning boshlanishi dunyo bozorlari uchun o‘ta yomon kelgani, Osiyo, Yevropa va Amerika fond maydonlarida salbiy dinamika kuzatilayotgani bunga asosiy omil bo‘lmoqda, deya xabar beradi “Interfaks”.
1-yanvardan beri eng katta yo‘qotish jahonning badavlat kishilari ro‘yxatida 4-o‘rinda qayd etilgan Amazon.com asoschisi Jeff Bezosning chekiga tushdi — 8,9 milliard dollar. Uning kompaniyasi aksiyalari bahosi 3,85 foizga pasaydi. Mazkur ro‘yxat peshqadami bo‘lgan Bill Geyts 6,8 milliard dollar yo‘qotdi, eng badavlat xitoylik sanaladigan Van Szyanlin esa 6,4 milliard dollardan mahrum bo‘ldi.
Yil boshidan beri 400 nafar eng boy kishidan atigi to‘qqiz nafari moliyaviy holatini yaxshilab olishga erishdi. Ular orasida ikki hafta mobaynida 620 million dollar ishlab olgan Reliance Industries Ltd rahbari, hindistonlik Mukesh Ambani yetakchilik qilmoqda.
Sayyoraning eng badavlat kishilari 2016-yilning birinchi savdo haftasida 194 milliard dollar yo‘qotgan edi.
Izoh (0)