Дунёнинг энг бой кишилари йил бошидан бери 305 млрд доллар йўқотди

Йилнинг илк икки ҳафтаси мобайнида сайёранинг энг бой 400 кишиси жами 305 миллиард доллар йўқотди. 2016 йилнинг бошланиши дунё бозорлари учун ўта ёмон келгани, Осиё, Европа ва Америка фонд майдонларида салбий динамика кузатилаётгани бунга асосий омил бўлмоқда, дея хабар беради «Интерфакс».

1 январдан бери энг катта йўқотиш жаҳоннинг бадавлат кишилари рўйхатида 4-ўринда қайд этилган Amazon.com асосчиси Жефф Безоснинг чекига тушди — 8,9 миллиард доллар. Унинг компанияси акциялари баҳоси 3,85 фоизга пасайди. Мазкур рўйхат пешқадами бўлган Билл Гейтс 6,8 миллиард доллар йўқотди, энг бадавлат хитойлик саналадиган Ван Цзяньлинь эса 6,4 миллиард доллардан маҳрум бўлди.

Йил бошидан бери 400 нафар энг бой кишидан атиги тўққиз нафари молиявий ҳолатини яхшилаб олишга эришди. Улар орасида икки ҳафта мобайнида 620 миллион доллар ишлаб олган Reliance Industries Ltd раҳбари, ҳиндистонлик Мукеш Амбани етакчилик қилмоқда.

Сайёранинг энг бадавлат кишилари 2016 йилнинг биринчи савдо ҳафтасида 194 миллиард доллар йўқотган эди.