AQSh prezidentligiga Respublikachilar partiyasidan nomzod bo‘lishga da’vogar milliarder Donald Tramp Manxettendagi o‘ziga tegishli hashamatli kvartiralardan birini katta chegirma bilan sotdi. Bu haqda Bloomberg manbalariga tayanib, “TASS” xabar bermoqda.
To‘rtta yotoqxona, oltita vanna va alohida liftga ega, maydoni 389 kvadrat metr bo‘lgan hamda Beshinchi avenyudagi osmono‘par binoning 27-qavatini to‘liq egallagan apartament o‘tgan yil dekabrida 16,8 million dollarga sotuvga qo‘yilgandi. Biroq Manxettenning mazkur hududida ko‘chmas mulk bahosi pasayganligi sababli Tramp kvartirani 14,1 million dollar, ya’ni dastlabki narxidan salkam 16 foiz arzon sotishga majbur bo‘lgan.
Trump Organization vakili Amanda Miller ushbu ma’lumotni tasdiqladi, lekin milliarderning o‘zi bu kvartirada hech qachon yashamaganini bildirib o‘tdi.
Izoh (0)