Eron amerikalik dengizchilarni ozod qildi — OAV

Eron harbiylari Tehron hududiy suvlari chegarasini kesib o‘tgan o‘n nafar amerikalik dengizchi ozod etilgani haqida e’lon qildi, deb yozadi “Korrespondent.net”.

Biroq bu ma’lumot Amerika tomonidan tasdiqlanganicha yo‘q.

Avvalroq AQSh harbiy-dengiz kuchlarining Kuvaytdan Bahraynga qarab ketayotgan ikkita kateri Eron hududiy suvlariga kirib qolgani va qo‘lga olingani haqida xabar berilgan edi. Ta’kidlanishicha, bu katerlardan biri ishdan chiqqach, sodir bo‘lgan. O‘n nafar ekipaj a’zosi hibsga olingan.

So‘ng Tehron Amerika harbiy kemalari Eron hududiy suvlariga bostirib kirgani uchun AQShdan uzr so‘rashni talab qilgan edi.

Biroz vaqt o‘tib, Tehron amerikalik harbiylarning xatti-harakatlari dushmanlik xususiyatiga ega bo‘lmaganini aytgan edi.