Yunusobod tumanidagi “Guliston” mahallasida 7-yanvar kuni FIFA referisi Ravshan Ermatov, uning otasi, sobiq futbol hakami Sayfiddin Ermatov hamda FIFA yon qanot hakami Abduhamidullo Rasulov bilan uchrashuv bo‘lib o‘tdi. Bu haqda O‘zbekiston Milliy universiteti dotsenti Sherzodxon Qudratxo‘jayev Facebook’dagi sahifasida ma’lum qildi.
“Sakson va to‘qsonni urib qo‘ygan mahalla otaxonlari Ravshanni ko‘rib, yoshliklarini, o‘zlari ko‘chalarni changitib, to‘p quvib yurgan zavqli paytlarni mazza qilib esladi. Munis onaxonlar ham Ravshanni astoydil duo qildi”, — deb yozadi Sherzodxon Qudratxo‘jayev.
Qayd etishlaricha, uchrashuv chog‘ida yilning har faslida Ravshan Ermatov, uning otasi Sayfiddin Ermatov va yon qanot hakami Abduhamidullo Rasulov ishtirokida bolalar uchun mahorat mashg‘ulotlari o‘tkazilishiga kelishib olingan.
Eslatib o‘tamiz, Ravshan Ermatov 2015-yil 27-dekabr kuni Globe Soccer Awards tanloviga ko‘ra, “Yil hakami” deb e’lon qilindi. 31-dekabr kuni esa O‘zbekiston Prezidenti Islom Karimov Ermatovni “Buyuk xizmatlari uchun” ordeni bilan mukofotlash to‘g‘risidagi farmonni imzoladi.
Izoh (0)