O‘zMTRK “Sport” telekanali futbol bo‘yicha U-23 Osiyo chempionati final bosqichi uchrashuvlaridan translyatsiyalar tashkil etish ustida ish olib bormoqda. Bu haqda “Daryo”ning telekanaldagi manbasi ma’lum qildi.
Ma’lum qilishlaricha, 2016-yilgi Olimpiya o‘yinlari yo‘llanmalari o‘ynaladigan musobaqa uchrashuvlarini efirga uzatish masalasi hal bo‘lish arafasida turibdi, telekanalning translyatsiyalarga mas’ul barcha bo‘linmalari musobaqaga tayyorgarlik ko‘rmoqda.
Alohida qayd etishlaricha, telekanal musobaqa doirasidagi qariyb barcha uchrashuvlarni namoyish etishni rejalashtirmoqda. O‘zbekiston U-23 terma jamoasi ishtirokidagi barcha uchrashuvlar jonli efirda namoyish etilishi ko‘zda tutilgan.
Eslatib o‘tamiz, O‘zbekiston olimpiya terma jamoasi 12-yanvar kuni Qatarda start oladigan Osiyo chempionati final bosqichi “C” guruhida Janubiy Koreya, Iroq hamda Yaman U-23 terma jamoalariga qarshi maydonga tushadi.
O‘zbekiston U-23 terma jamoasi Osiyo chempionati bahslarini 13-yanvar kuni Janubiy Koreya olimpiya terma jamoasiga qarshi o‘yin bilan boshlaydi. O‘zbekiston olimpiya terma jamoasi guruh bosqichidagi ikkinchi o‘yinini 16-yanvar kuni Iroq olimpiya terma jamoasiga qarshi o‘tkazsa, so‘nggi turda Samvel Babayan bosh murabbiyligidagi terma jamoa Yamanga qarshi maydonga tushadi.
Oldinroq mazkur OChda ishtirok etadigan O‘zbekiston olimpiya termasining tarkibi e’lon qilingandi. Terma jamoa musobaqa arafasida so‘nggi yig‘inni o‘tkazish uchun Dubayga jo‘nab ketgan.
Izoh (0)