ЎзМТРК «Спорт» телеканали футбол бўйича U-23 Осиё чемпионати финал босқичи учрашувларидан трансляциялар ташкил этиш устида иш олиб бормоқда. Бу ҳақда «Дарё»нинг телеканалдаги манбаси маълум қилди.
Маълум қилишларича, 2016 йилги Олимпия ўйинлари йўлланмалари ўйналадиган мусобақа учрашувларини эфирга узатиш масаласи ҳал бўлиш арафасида турибди, телеканалнинг трансляцияларга масъул барча бўлинмалари мусобақага тайёргарлик кўрмоқда.
Алоҳида қайд этишларича, телеканал мусобақа доирасидаги қарийб барча учрашувларни намойиш этишни режалаштирмоқда. Ўзбекистон U-23 терма жамоаси иштирокидаги барча учрашувлар жонли эфирда намойиш этилиши кўзда тутилган.
Эслатиб ўтамиз, Ўзбекистон олимпия терма жамоаси 12 январь куни Қатарда старт оладиган Осиё чемпионати финал босқичи «C» гуруҳида Жанубий Корея, Ироқ ҳамда Яман U-23 терма жамоаларига қарши майдонга тушади.
Ўзбекистон U-23 терма жамоаси Осиё чемпионати баҳсларини 13 январь куни Жанубий Корея олимпия терма жамоасига қарши ўйин билан бошлайди. Ўзбекистон олимпия терма жамоаси гуруҳ босқичидаги иккинчи ўйинини 16 январь куни Ироқ олимпия терма жамоасига қарши ўтказса, сўнгги турда Самвел Бабаян бош мураббийлигидаги терма жамоа Яманга қарши майдонга тушади.
Олдинроқ мазкур ОЧда иштирок этадиган Ўзбекистон олимпия термасининг таркиби эълон қилинганди. Терма жамоа мусобақа арафасида сўнгги йиғинни ўтказиш учун Дубайга жўнаб кетган.
Изоҳ (0)