Gretsiyalik me’morlar jamoasi bundan 2000 yil avval zilzila oqibatida vayron bo‘lgan dunyoning yetti mo‘jizasidan biri — Rodoslik Koloss haykalini tiklash loyihasini taqdim etdi. Bu haqda “Vokrug sveta” xabar bermoqda.
Yangi haykal asl nusxasidan 5 barobar katta bo‘lib, balandligi 135 metrga yetishi ko‘zda tutilgan. Uni eski o‘rni — port shahri bo‘lgan Rodos qo‘ltig‘iga kiraverishda o‘rnatiladi. Shaharga kirib kelayotgan kemalar antik davrlardagi kabi ulkan haykal oyoqlari orasidan suzib o‘tadi. Kolossning ichida antik davr muzeyi va kutubxona joylashishi mo‘ljallangan.
Loyiha mualliflari hisob-kitobiga ko‘ra, haykalni bunyod etish xarajatlari 250 million yevroga boradi. Bu mablag‘ taxminan 7 yilda o‘zini oqlashi kutilmoqda: Koloss sayyohlar jalb etilishi hisobiga yiliga 35 million yevro daromad keltirishi mumkin.
Loyiha bosh me’mori Aris Pallasning aytishicha, yangi Koloss Gretsiya iqtisodiyoti tiklanishi ramzi bo‘lishi lozim. “Biz Gretsiya yana oyoqqa turishi, iqtisodiyoti tiklanishi mumkinligi, buning uchun unda kuch borligini ko‘rsatib bermoqchimiz”, — deya ta’kidlagan Pallas.
Izoh (0)