Грециялик меъморлар жамоаси бундан 2000 йил аввал зилзила оқибатида вайрон бўлган дунёнинг етти мўъжизасидан бири — Родослик Колосс ҳайкалини тиклаш лойиҳасини тақдим этди. Бу ҳақда «Вокруг света» хабар бермоқда.
Янги ҳайкал асл нусхасидан 5 баробар катта бўлиб, баландлиги 135 метрга етиши кўзда тутилган. Уни эски ўрни — порт шаҳри бўлган Родос қўлтиғига кираверишда ўрнатилади. Шаҳарга кириб келаётган кемалар антик даврлардаги каби улкан ҳайкал оёқлари орасидан сузиб ўтади. Колосснинг ичида антик давр музейи ва кутубхона жойлашиши мўлжалланган.
Лойиҳа муаллифлари ҳисоб-китобига кўра, ҳайкални бунёд этиш харажатлари 250 миллион еврога боради. Бу маблағ тахминан 7 йилда ўзини оқлаши кутилмоқда: Колосс сайёҳлар жалб этилиши ҳисобига йилига 35 миллион евро даромад келтириши мумкин.
Лойиҳа бош меъмори Арис Палласнинг айтишича, янги Колосс Греция иқтисодиёти тикланиши рамзи бўлиши лозим. «Биз Греция яна оёққа туриши, иқтисодиёти тикланиши мумкинлиги, бунинг учун унда куч борлигини кўрсатиб бермоқчимиз», — дея таъкидлаган Паллас.
Изоҳ (0)