2000-yil kirib kelganda, barcha kompyuterlar o‘chib qolib, oxir zamon bo‘lishi haqida qo‘rqinchli ovozalar tarqalgandi. Bunday bo‘lib chiqmaganini hamma biladi. Ammo kanadalik Norman Feller uzoq vaqtgacha bundan bexabar edi, deb xabar qiladi “Segodnya.ua”.
Feller 2000-yil kirib kelishi bilan qiyomat bo‘lishiga va faqat yer ostida jon saqlash mumkinligiga ishongan odamlarning kichik guruhi a’zosi edi. Ular yana sayyora hayot uchun yaroqli bo‘lishi uchun 15 yil kerak bo‘ladi, deb hisoblagan.
Shu sababli 44 yoshli Norman Yangi yil arafasida orqa hovlisida uzoq vaqt o‘zi tayyorlagan bunkerga tushgan va u yerda deyarli 14 yil qolib ketdi. Aniqroq aytadigan bo‘lsak, bunkerda 5006 kun yashadi.
Yer yuziga chiqqanidan keyin Feller hayotining katta qismini yo‘qotganini tushundi. Ko‘p narsalar deyarli o‘z holicha qolganini ko‘rib, hayratga tushdi. Uning uyi o‘zgarmagan edi, avtomobili esa garajda turardi. Televizor orqali esa “Simpsonlar” multfilmi hali ham efirga uzatilayotgandi… Ammo odamlar bilan suhbatlashib, shahar bo‘ylab sayr qilib, ancha-muncha narsa o‘zgarganini tushunib yetdi: har bir odamning qo‘lida mobil telefonlar bor, kitob va musiqa do‘konlari esa qayergadir yo‘qolib qolgandi…
Norman bunkerdagi hayotigacha umr yo‘ldoshi bo‘lgan Debbining yangi eri bilan tanishishiga to‘g‘ri keldi. Norman qaytganidan so‘ng kechirim so‘rashga urindi, biroq uning uzri qabul qilinmadi.
“Biz hammamiz olam halokatga uchrashidan xavotirlanishni bas qilib, shunchaki yashashimiz kerakligini tushundim”, — dedi 14 yil uzlatda yashagan Norman.
Izoh (0)