Suriyada siyosiy o‘tish jarayoni uchun “ko‘prik qurish” va bunda mamlakat prezidenti Bashar Asadning ittifoqdoshlari manfaatlarini hisobga olish zarur. Bu haqda 18-dekabr, juma kuni AQSh prezidenti Barak Obama yil yakunlariga bag‘ishlangan matbuot anjumanida ma’lum qilgan, deya xabar beradi “TASS”.
Davlat rahbarining ta’kidlashicha, ayni paytda “Asadning ittifoqdoshi bo‘lganlar, rossiyaliklar, eronliklar manfaatini inobatga oluvchi hokimiyatni siyosiy topshirish jarayonini amalga oshirish imkoni bor”. Amerika yetakchisi Suriya rahbari mansub bo‘lgan diniy ozchilik — alaviylar manfaatlarini ham himoya qilish lozimligi , hokimiyatni topshirish jarayoni Suriyaning yagona davlat sifatida saqlanib qolishi va o‘t ochishning to‘xtatilishini o‘z ichiga olishi zarurligini aytib o‘tdi.
Shu bilan birga, Obama yana bir bor “mamlakatda qon to‘kilishini to‘xtatish uchun Asad ketishi lozimligi”ni bildirdi. Uning aytishicha, “qonuniyligi aholining aksariyat qismi tan oladigan hukumat bo‘lmaguncha Suriyada tinchlik hukm surmaydi va fuqarolik urushiga barham berib bo‘lmaydi”.
Izoh (0)