Turkiya bosh vaziri Ahmet Davuto‘g‘li Rossiya prezidenti Vladimir Putinning Turkiyada “sudraluvchi islomlashtirish” jarayoni ketayotgani va turklar “Amerika rahbariyatini yalashni xohlashi” haqidagi fikrlariga munosabat bildirarkan, bu so‘zlar jiddiy qabul qilinsa, haqorat sifatida baholanishi mumkinligini aytib o‘tdi. “Shu sababli ham bu so‘zlarga tabassum bilan munosabatda bo‘lish kerak”, — deya, Davuto‘g‘lining so‘zlaridan iqtibos keltirmoqda “RBK”.
Davuto‘g‘li Rossiya prezidenti bundan bir oy oldin, aniqrog‘i, Su-24 bilan bog‘liq voqeadan avval ham shunday fikrlar bildirgan bo‘larmidi, deb savol qo‘ydi. “Birdan Turkiya islomlashtirish jarayoni ketayotgan musulmon mamlakatga, AQSh bilan juda yaqin aloqalarga ega davlatga aylanib qoldi. Bir oy avval shunday desang, sensatsiya bo‘lardi. Hozir esa bunday bayonotlarni kontekstdan tashqari qabul qilib bo‘lmaydi”, — dedi Turkiya bosh vaziri.
Rajab Toyyib Erdo‘g‘on oilasining korrupsiyaviy ishlarga aloqadorligi borasida Putin bayonotiga munosabat bildirarkan, Davuto‘g‘li bu so‘zlarni “sovetcha tashviqot” deb atadi. Turkiya bosh vazirining so‘zlariga ko‘ra, bu kabi so‘zlar Putin sovet davrida KGB (Davlat xavfsizlik qo‘mitasi)da ishlagani bilan bog‘liq. “Biroq u davrlar o‘tmishda qoldi”, — dedi Davuto‘g‘li.
Izoh (0)