Armaniston huquq-tartibot idoralari mamlakat bosh vazirining sobiq o‘rinbosari (mudofaa vaziri o‘rinbosari lavozimini ham egallagan) Vagan Shirxanyanni hibsga oldi. Bu haqda Meduza xabar bermoqda.
Mamlakat milliy xavfsizlik xizmati tomonidan tarqatilgan xabarda Shirxanyan “Artur Vardanyan tomonidan tuzilgan jinoiy guruh faoliyatida ishtirok etgani va aniq topshiriqlar olgani” ma’lum qilingan.
Artur Vardanyan boshchiligidagi jinoiy guruh qo‘lga olingani haqida 25-noyabrda e’lon qilindi. Guruh tomonidan Yerevanda ijaraga olingan kvartiradan tintuv chog‘ida avtomatlar, pistoletlar, granatomyotlar, granatalar, portlovchi qurilmalar, zirhli nimchalar va aloqa vositalari topilgan.
Armaniston milliy xavfsizlik xizmati rahbari Gorik Akopyan ta’kidlashicha, guruh a’zolari “davlat va jamoat arboblari, fuqarolarni o‘ldirishga tayyorgarlik ko‘rgan”. Mazkur jinoiy guruh ishi bo‘yicha jami 21 kishi qo‘lga olingani aytilmoqda.
Izoh (0)