Сурияда сиёсий ўтиш жараёни учун «кўприк қуриш» ва бунда мамлакат президенти Башар Асаднинг иттифоқдошлари манфаатларини ҳисобга олиш зарур. Бу ҳақда 18 декабрь, жума куни АҚШ президенти Барак Обама йил якунларига бағишланган матбуот анжуманида маълум қилган, дея хабар беради «ТАСС».
Давлат раҳбарининг таъкидлашича, айни пайтда «Асаднинг иттифоқдоши бўлганлар, россияликлар, эронликлар манфаатини инобатга олувчи ҳокимиятни сиёсий топшириш жараёнини амалга ошириш имкони бор». Америка етакчиси Сурия раҳбари мансуб бўлган диний озчилик — алавийлар манфаатларини ҳам ҳимоя қилиш лозимлиги , ҳокимиятни топшириш жараёни Суриянинг ягона давлат сифатида сақланиб қолиши ва ўт очишнинг тўхтатилишини ўз ичига олиши зарурлигини айтиб ўтди.
Шу билан бирга, Обама яна бир бор «мамлакатда қон тўкилишини тўхтатиш учун Асад кетиши лозимлиги»ни билдирди. Унинг айтишича, «қонунийлиги аҳолининг аксарият қисми тан оладиган ҳукумат бўлмагунча Сурияда тинчлик ҳукм сурмайди ва фуқаролик урушига барҳам бериб бўлмайди».
Изоҳ (0)