Buxoro viloyatida jinoyatlarni o‘z vaqtida fosh etishga yordam bergan fuqarolar viloyat prokuraturasi tashakkurnomasi bilan taqdirlandi. Bu haqda “Huquq” gazetasi xabar bermoqda.
Xabar berishlaricha, viloyatda O‘zbekiston Bosh prokurorining “Qonun ustuvorligini ta’minlash va qonuniylikni mustahkamlash hamda jamiyatda huquqiy madaniyatni yuksaltirishda faol ishtirok etayotgan fuqarolar va yuridik shaxslarni rag‘batlantirish to‘g‘risida”gi buyrug‘iga muvofiq, tadbir uyushtirildi.
Unda fuqarolar Z.Ramazonov va F.Kamoliddinovning ishi alohida e’tirof etildi.
Ma’lum bo‘lishicha, romitanlik Z.Ramazonov boshqaruvida bo‘lgan Matiz’ga yo‘lovchi sifatida o‘tirgan P.Fazliyev (ism-familiya shartli ravishda o‘zgartirilgan)ning xatti-harakatlaridan shubhalanib, mashinasini to‘g‘ri tuman IIBga haydab kelgan. Jinoyatchi ashyoviy dalillar bilan qo‘lga olingan.
Xuddi shuningdek, F.Kamoliddinov Sh.Shodiyevaning do‘koniga o‘g‘irlikka kirgan T.Botirovni ushlab, huquqni muhofaza qiluvchi idoralarga xabar bergan.
“Har ikki holatda ham ular jinoyatning o‘z vaqtida fosh etilishida yordam berib, konstitutsiyaviy burchlarini ado etish bilan birga, yurtdoshlari taqdiriga befarq emasliklarini ko‘rsatgan”, — deyiladi gazeta xabarida.
Izoh (0)