“Turkiston” saroyida O‘zbekiston taraqqiyotiga munosib hissa qo‘shayotgan bir guruh yoshlarga “O‘zbekiston belgisi” ko‘krak nishonini tantanali topshirish marosimi bo‘lib o‘tdi. Bu haqda O‘zA xabar bermoqda.
Tantanali marosim oldidan tadbir ishtirokchilari Mustaqillik va ezgulik monumenti poyiga gul qo‘ydi.
“O‘zbekiston belgisi” ko‘krak nishoni vatanparvarlik, xalqparvarlik, fidoyilik, mehnatsevarlik fazilatlarini o‘zida mujassamlashtirgan, O‘zbekiston sharafini yuksaltirishga, xalqaro nufuzini oshirishga hissa qo‘shayotgan, ijtimoiy-siyosiy hayotda faol ishtirok etib, tengdoshlariga namuna bo‘layotgan yoshlarni qo‘llab-quvvatlash maqsadida O‘zbekiston Prezidenti farmoni bilan ta’sis etilgan yuksak mukofotlardan biridir.
2003-yildan buyon ushbu nufuzli ko‘krak nishoni bilan ilm-fan, madaniyat, ta’lim, sog‘liqni saqlash, san’at, jurnalistika, sport, qishloq xo‘jaligi, kichik biznes, huquq va harbiy sohalarda yuksak natijalarga erishgan 435 nafar yigit-qiz taqdirlandi. 2015-yilda 22 nafar iqtidorli yoshlar ushbu yuksak mukofotga sazovor bo‘ldi.
Marosim estrada xonandalari va yosh ijrochilar ishtirokidagi konsert bilan yakunlandi.