Бухоро вилоятида жиноятларни ўз вақтида фош этишга ёрдам берган фуқаролар вилоят прокуратураси ташаккурномаси билан тақдирланди. Бу ҳақда «Ҳуқуқ» газетаси хабар бермоқда.
Хабар беришларича, вилоятда Ўзбекистон Бош прокурорининг «Қонун устуворлигини таъминлаш ва қонунийликни мустаҳкамлаш ҳамда жамиятда ҳуқуқий маданиятни юксалтиришда фаол иштирок этаётган фуқаролар ва юридик шахсларни рағбатлантириш тўғрисида»ги буйруғига мувофиқ, тадбир уюштирилди.
Унда фуқаролар З.Рамазонов ва Ф.Камолиддиновнинг иши алоҳида эътироф этилди.
Маълум бўлишича, ромитанлик З.Рамазонов бошқарувида бўлган Matiz’га йўловчи сифатида ўтирган П.Фазлиев (исм-фамилия шартли равишда ўзгартирилган)нинг хатти-ҳаракатларидан шубҳаланиб, машинасини тўғри туман ИИБга ҳайдаб келган. Жиноятчи ашёвий далиллар билан қўлга олинган.
Худди шунингдек, Ф.Камолиддинов Ш.Шодиеванинг дўконига ўғирликка кирган Т.Ботировни ушлаб, ҳуқуқни муҳофаза қилувчи идораларга хабар берган.
«Ҳар икки ҳолатда ҳам улар жиноятнинг ўз вақтида фош этилишида ёрдам бериб, конституциявий бурчларини адо этиш билан бирга, юртдошлари тақдирига бефарқ эмасликларини кўрсатган», — дейилади газета хабарида.
Изоҳ (0)