AQSh ma’muriyati mudofaa vazirligining Guantanamodagi qamoqxonani yopish va mamlakat hududida unga o‘xshash inshoot barpo etish rejasini rad etdi. Bu rejani amalga oshirish uchun Pentagon 600 million dollar so‘ragan, bundan 350 millioni yangi qamoqxona qurilishiga ishlatilishi ko‘zda tutilgandi. Bu haqda “RIA Novosti” xabar bermoqda.
AQSh 1903-yildan beri Kubadan ijaraga olib, foydalanib keladigan Guantanamodagi bazada 2002-yili qamoqxona tashkil etilgan va unda Amerika maxsus xizmatlari terrorizmda ayblagan turli mamlakatlardan kelgan yuzlab odamlar hibsda saqlangan. Ularning aksariyatiga hozirgacha rasman ayblov e’lon qilinmagan. Ayni paytda Guantanamoda 112 kishi saqlanmoqda.
Barak Obama 2009-yili prezidentlik lavozimini egallagandan so‘ng qamoqxonani tugatish yuzasidan ko‘rsatma bergan, biroq buni amalga oshirishning imkoni bo‘lmagandi. Prezident ma’muriyati doimiy ravishda kongressga mazkur qarorni qo‘llash bo‘yicha murojaat qiladi, ammo qonun chiqaruvchilar buni har gal rad etib keladi. AQShning 2016-yil uchun mudofaa budjetiga ham qamoqxonani yopish uchun xarajatlar kiritilmagan.
Izoh (0)